महाराष्ट्र कोविड नियमावली जारी

करोना विषाणूच्या संसर्गावर नियंत्रण आणण्यासाठी राज्यात एपिडेमिक अॅक्ट लागू करण्यात आला आहे. या नियमावलीस 'महाराष्ट्र कोविड १९ उपयायोजना नियम २०२०' असे संबोधण्यात येणार आहे. या नियमांनुसार जागतिक आरोग्य संघटना तसेच, आरोग्य व कुटुंब कल्याण मंत्रालयाने कोविड १९ बाधित रोगव्याख्येत नमूद केलेली लक्षणे असलेल्या संशयित रुग्णाला विलगीकरण कक्षात दाखल करण्याचे अधिकार सरकारला देण्यात आले आहेत. या निर्णयाला आडकाठी करणाऱ्या व्यक्तीवर भारतीय दंड संहितेच्या कलम १८८नुसार कारवाई करण्यात येईल. शहर, गाव, तालुका, वॉर्ड, तालुका, कॉलनी इत्यादीमध्ये कोविड १९चा प्रादुर्भाव वा उद्रेक असलेल्या प्रतिबंधात्मक उपायोजना करण्यासाठी संबधित जिल्हाधिकारी, पालिका आयुक्त सक्षम प्राधिकारी असतील अशा भौगोलिक क्षेत्रांच्या बाबतीत क्षेत्र प्रतिबंधित करणे, येथील नागरिकांचे आगमन वा प्रस्थानास प्रतिबंध करणे, या ठिकाणांहून वाहनांना जाण्यास प्रतिबंध करण्याचे अधिकार सरकारच्या संबधित यंत्रणांना आहेत. कोविड १९चा प्रादुर्भाव रोखण्यासाठी केलेले कृत्य हे लोकहिताच्या उद्देशाने असल्याने या नियमावलीची अंमलबजावणी करणाऱ्या प्राधिकृत अधिकाऱ्याविरुद्ध गुन्हे दाखल करता येणार नाही. ही नियमावली आजपासून एक वर्ष किंवा आवश्यकतेनुसार पुढील आदेश मिळेपर्यंत अंमलात राहील.